وزیراعظم شہباز شریف نے توشہ خانہ کے تحائف نیلام کرکے حاصل ہونےوالی رقم غریبوں پر خرچ کرنے کا اعلان کردیا ہے۔
تفصیلات کے مطابق وزیراعظم نے صحافتی تنظیموں کےو فود سے ملاقات کے دوران کہا کہ توشہ خانہ میں موجود تحائف نیلام کردیئے جائیں گے اور ان تحائف کی نیلامی سے حاصل ہونے والی رقم غریب اور لاچار افراد پر خرچ کی جائے گی۔
شہباز شریف نے سابق وزیراعظم عمران خان کو تنقید کا نشانہ بناتے ہوئے کہا کہ جب اقتدار میں آئے تو حالات کی سنگینی کا اندازہ نہیں تھا، گزشتہ حکومت کے چارسال میں بدقسمتی سے ملک کے ساتھ بہت زیادتیاں کی گئیں،اس دور میں غرور و تکبر کو ملک نے گھیرا ہوا تھا۔
انہوں نے مزید کہا کہ دوسروں کو چور کہنے والا آج خود جیل میں ہے، ان کی گرفتاری مکافات عمل ہے، کل میں اسمبلیوں کی تحلیل کی سمری صدر مملکت کو بھیج دوں گا، تمام جماعتوں کا اتفاق ہے کہ جتنی جلدی ممکن ہوسکے انتخابات کروائے جائیں۔
انہوں نے مزید کہا کہ دوست ممالک کے ساتھ 4 سال میں تعلقات خراب کیے گئے، اب دوست ممالک کہتے ہیں آپ منصوبے لائیں ہم سرمایہ کاری کریں گے، اللہ نے پاکستان کو بہت سے وسائل سے نوازا ہے مگر ہم نے سوچ لیا ہے کہ کام نہیں کرنا، ہم نےملک کی تقدیر کو بدلنا اور قرضوں سے نجات حاصل کرنی ہے۔
