پاکستان کرکٹ بورڈ نے آسٹریلوی کرکٹر جیمز فالکنر کی جانب سے معاوضے سے متعلق بیان پر سخت ردعمل دیدیا ہے۔
تفصیلات کے مطابق پاکستان سپر لیگ میں کوئٹہ گلیڈی ایٹرز کی نمائندگی کرنے والے آسٹریلوی کرکٹر جیمز فالکنر نے آج پی ایس ایل کو خیر آباد کہتے ہوئے الزام عائد کیا کہ ان کے ساتھ کیے ہوئے معاہدے اور معاوضے کی پاسداری نہیں کی جارہی ۔
پاکستان کرکٹ بورڈ نے اس الزام پر ردعمل دیتے ہوئے ٹویٹر پر ایک بیان جاری کیا جس میں کہا گیا ہے کہ جیمز فالکنر نے بورڈ پر غلط اور گمراہ کن الزامات عائد کیے، بہت جلد ان الزامات پر تفصیلی بیان بھی جاری کیا جائے گا۔
یادرہے کہ جیمز فالنکر نے پی سی بی پر الزامات عائد کرتے ہوئے اپنے بیان میں کہا تھا کہ میں پی ایس ایل کے بقیہ 2 میچز نہیں کھیل سکوں گا کیونکہ میں اپنے ملک واپس جارہا ہوں۔
انہوں نے مزید کہا تھا کہ میں لیگ چھوڑنے پر شائقین سے معذرت خواہ ہوں ، مگر پی سی بی میرے ساتھ کیے گئے معاہدے اور معاوضے کو پورا نہیں کررہا، میں پورا وقت یہاں موجود رہا ہوں مگر مجھ سے مسلسل جھوٹ پر جھوٹ بولا جارہا ہے اور اسی لیے میں یہ تلخ فیصلہ لینے پر مجبور ہوا ہوں۔
انہوں نے مزید کہا کہ مجھے پی ایس ایل چھوڑنے میں تکلیف محسوس ہورہی ہے، میں پاکستان میں بین الاقوامی کرکٹ کی واپسی کیلئے مددگار ثابت ہونا چاہتا تھا کیونکہ یہاں کے شائقین حیرت انگیز ہیں اور یہاں نوجوان کرکٹرز کا بہت ٹیلنٹ موجود ہے، مگرمیرے ساتھ ذلت آمیز رویہ روا رکھا گیا ، مجھے امید ہے کہ میری پوزیشن کو سمجھا جائے گا۔