سرکاری نشریاتی ادارے (پی ٹی وی) کے نوٹس پر قومی کرکٹ ٹیم کے سابق فاسٹ بولر شعیب اختر نے قانونی جنگ لڑنے کا اعلان کردیا۔
تفصیلات کے مطابق پاکستان ٹیلی ویژن (پی ٹی وی) نے شعیب اختر کو ہرجانے کے لئے نوٹس جاری کیا تھا جس میں راولپنڈی ایکسپریس سے 10 کروڑ روپے ہرجانے کا مطالبہ کیا گیا ہے۔
شعیب اختر نے پی ٹی وی کی جانب سے جاری نوٹس پر مایوسی کا اظہار کیا اور کہا کہ جب میں پی ٹی وی کے لیے ہی کام کر رہا تھا تو اس دوران ادارہ میری عزت کو محفوظ کرنے میں بری طرح ناکام رہا اور اب انہوں نے مجھے نوٹس بھیج دیا ہے۔
سابق فاسٹ باولر نے کہا کہ میں فائٹر ہوں اور کسی کو ایسے ہی نہیں چھوڑتا، اب میں یہ قانونی جنگ بھی لڑوں گا۔ راولپنڈی ایکسپریس نے مزید کہا کہ اب میرے وکیل سلمان نیازی اس معاملے کو قانون کے مطابق دیکھیں گے۔
واضح رہے کہ پی ٹی وی کی جانب سے جاری نوٹس میں کہا گیا ہے کہ شعیب اختر نے بغیر بتائے اماراتی ریاست دبئی جاکر بھارتی کرکٹرز کے ساتھ شو کیا جس کی وجہ سے سرکاری ٹی وی کو نقصان کا سامنا کرنا پڑا۔
شعیب اختر کی ورلڈ کپ ٹی ٹوئنٹی کے درمیان غیر حاضری پر بھیجے گئے نوٹس میں کہا گیا ہے کہ آپ کی وجہ سے پی ٹی وی کو جو نقصان ہوا اس پر 100 ملین روپے ادا کریں۔
26 اکتوبر کو سرکاری ٹی وی پر لائیو شو کے دوران پروگرام کے میزبان ڈاکٹر نعمان نیاز نے ویوین رچرڈز اور ڈیوڈ گاور سمیت دیگر مہمانوں کے سامنے شعیب اختر سے نامناسب رویہ اختیار کرتے ہوئے شو چھوڑ کر جانے کا کہا تھا۔