پاکستان سپر لیگ (پی ایس ایل ) سیزن 7 کی ڈرافٹنگ کی تقریب میں سلورکیٹیگری میں منتخب ہونے پر ٹیسٹ کرکٹر کامران اکمل بطور احتجاجاً لیگ سے دستبردار ہوگئے۔
تفصیلات کے مطابق پاکستان سپر لیگ کے سیزن 7 کی ڈرافٹنگ کی تقریب ہائی پرفارمنس سینٹر لاہور میں منعقد ہوئی جس میں فرنچائز کے آفیشلز اور کھلاڑیوں نے شرکت کی۔
پی ایس ایل 7 کے لیے پشاور زلمی کی جانب سے کامران اکمل کو سلور کیٹیگری میں منتخب کیا گیا جس کے بعد کرکٹر نے اپنے ایک بیان میں پی ایس ایل سے دستبردار ہونے کا اعلان کردیا کامران اکمل نے احتجاج کرتے ہوئے کہا کہ شاید اب ٹیم کو ان کی ضرورت نہیں رہی جس کی وجہ سے یہ فیصلہ لیا گیا۔
انہوں نے مزید کہا کہ مجھے سلورکیٹیگری میں پک کرنے سے بہتر ہے کہ فرنچائز نئے ٹیلنٹ کو موقع دے۔
انہوں نے اپنی کیٹیگری پلاٹینم سے گولڈ پر آنے کے حوالے سے برہمی کا اظہار کرتے ہوئے کہا کہ پی ایس ایل میں اپنی کارکردگی کی بنیاد پر گولڈ کیٹیگری کا مستحق تھا لیکن مجھے سلور میں منتخب کیا گیا۔
پی ایس ایل سے دستبرداری کا عندیہ دیتے ہوئے کامران اکمل نے کہا کہ میرا نہیں خیال کہ مجھے اس ایڈیشن میں کھیلنا چاہیے۔