سابق وفاقی وزیر فواد چوہدری نے مریم نواز کے ایک ٹوئٹ پر ردعمل دیتے ہوئے کہا ہے کہ وہ کیوں الیکشن سے ڈر رہے ہیں اور کیوں اس سے راہ فرار اختیار کر رہے ہیں؟
تفصیلات کے مطابق سماجی رابطے کی ویب سائٹ ٹوئٹر پر مریم نواز نے غیر ملکی خبر رساں ادارے بلوم برگ کی ایک خبر شیئر کی جس میں دعویٰ کیا گیا ہے کہ عمران خان کی حکومت کا خاتمی ہونے پر 57 فیصد پاکستانی خوش ہیں۔
اس ٹوئٹ پر ردعمل دیتے ہوئے فواد چوہدری نے کہا کہ تو پھر الیکشن کا کیا ڈر؟ آپ الیکشنوں سے کیوں فرار اختیار کر رہے ہیں آئیں الیکشن کرائیں، مقابلے کا فیصلہ میدان میں ہونا ہے شریف فیملی کے کچن میں ہونیوالے والے سروے بے وقعت ہیں۔
یاد رہے کہ بلومبرگ نے گیلپ پاکستان کے سروے کی رپورٹ شیئر کی ہے جس کے مطابق 57 فیصد عوام نے وزیراعظم عمران خان کو وزارت عظمیٰ سے ہٹائے جانے پرخوشی کا اظہار کیا جبکہ 43 فیصد افراد ناراض نظر آئے ۔
گیلپ سروے کے مطابق خوش ہونے والوں میں سے71 فیصد نے مہنگائی اور غربت میں اضافے کو حکومت کے جانے پر خوش ہونے کی اہم وجہ بتایا۔
دوسری جانب ناراض ہونے والوں میں سے 13 فیصد اس وجہ سے ناراض تھے کہ عمران خان کو 5 سال مکمل کیوں نہیں کرنے دیے۔
