تحریر:جانی
یہ دوہزار چارکے آس پاس کی بات ہے۔۔جب میں انگلینڈ سے آسٹریلیا تازہ تازہ شفٹ ہوا تھا۔۔شاید انگریزوں کی نقالی کرتے ہوئے۔۔کہ ان کے منہ سے آسٹریلیا کے قصے کچھ الگ ہی طرح کا مزہ دیتے تھے۔۔
چند ہفتے نیو ساوتھ ویلز و کیمبرہ میں گھوم پھر کر ، شمال کی طرف جانے کا ارادہ کیا، ۔اورانٹر نیٹ پر تلاش کرکے،کوئینز لینڈ کے ایک چھوٹے شہر میں واقع ایک موٹل کا ٹیلیفون کڑکا دیا۔ موٹل کا مالک جس کا نام جمی تھا، نے بتایا کہ اس ہفتے کوئ جگہ خالی نہیں مگر اگلے ہفتے جگہ مل سکتی ہے۔۔
ادھوری بکنگ کی بات کرنے کے بعد جب میں نے اس سے ائیرپورٹ سے اس کی جگہ پہنچنے کا طریقہ کار پوچھا تو اس نے بتا یا کہ تم ٹیکسی بھی لے سکتے ہو۔ مگر آنے سے پہلے اگر مجھے اطلاع کر دو، تو میں خود ہی پک اپ کرنے آجاونگا۔۔
اگلے ہفتے میری فلائیٹ مجھے منزل تک پہنچانے سے پہلے برسبن لے گئی جو کہ آدھے رستے میں پڑتا تھا۔۔مگر جانے سے پہلے میں نے جمی کو اطلاع دے دی تھی۔۔ جس نے مجھے پک اپ کرنے کا وعدہ کیا۔۔
کوئنزلینڈ کے اس چھوٹے سے شہر کی آبادی چونکہ ایک لاکھ کے آس پاس تھی، اسی لیئے وہاں کا ایئرپورٹ بھی چھوٹا سا تھا، مگر پیارا، اور نیا نویلا۔
میں جیسے ہی ارائیول لاونچ پہنچا، تو ایک قدرے دبلے پتلے،لمبے مگر گنجے اور اُدھیڑ عمر شخص کو اپنے نام کی تختی لیئے پایا۔۔ آج کل تو بندہ فوٹو یا ویڈیو کال کے ذریعے ایک دوسرے کو دیکھ لیتا ہے مگر اس زمانے میں موبائل کی سکرین پر رنگ تو آنا شروع ہوا تھا، مگر کیمرہ ابھی اتنا عام نہیں تھا۔
ہائے ہیلو اور مُسکُراہٹوں کے تبادلے کے بعد، اس نے میرے دو بیگوں میں سے ایک بیگ ہاتھ میں لیا اور میں اسے فالو کرتے ہوئے اس کے سٹیشن ویگن نما گاڑی کے پاس کھلے آسمان تلے،
خوبصورت اور کشادہ کار پارک پہنچا۔ ۔اسکے تھوڑی ہی دیر میں ہماری گاڑی وہاں کی خاموش سڑکوں پر دوڑ رہی تھی۔
کوئی پندرہ منٹ کے سفر کے بعد ہماری گاڑی ایک چھوٹی سی چڑھائی پر چڑھتے ہوئے ایک موٹل کی پارکنگ میں داخل ہوئی۔۔ مگر موٹل کا نام پڑھ کر مجھے حیرانی سی ہوئی اور اس سے پہلے کہ میں جمی سے سوال کرتا۔ جمی نے تسلی سے گاڑی پارک کرکےجو بات بتائی وہ میرے لیئے حیرانی سے زیادہ شرمندگی کا احساس دلارہی تھی۔۔
جمی نے بتایا کہ چونکہ میرے موٹل میں ،جگہ خالی نہیں ہوپائی تھی۔اس لیئے وہ مجھے یہاں لے آیا۔۔ جس پر میں نے کہاکہ میں خود ہی چلا آتا تم نے زحمت کیوں کی پھر۔۔تو وہ بولا کیونکہ میں پرومس کرچکا تھا۔۔اس کے احساس نے مجھے شرمندہ سا کردیا تھا۔۔اگرچہ تھوڑی دیر کو میں کچھ بدگمان سا ہوا کہ شاید جمی نے ان سے کمیشن کھراکیا ہوگا۔۔۔مگر میرا وہ خیال بھی غلط ثابت ہو ا۔۔ کیونکہ یہ موٹل کوئی اس علاقے یا ملک کا لوکل نہیں تھا۔ بلکہ انٹرنیشنل تھا۔۔جنہیں چھوٹے کمیشن خوروں کی ضرورت نہیں ہوتی۔ بلکہ لوگ ان کے نام کی
وجہ سے ہی آتے رہتے ہیں۔۔ جمی نے ویسے بھی آتے یا جاتے ہوئے ان کو اپنا منہ نہیں دکھایا تھا۔۔اور شایدمجھے بھی اسی لیئے یہاں لایا تھا کہ یہاں جگہ ضرور مل جائے گی۔
تقریبا ایک ہفتہ وہاں قیام کے بعد جب جمی کے موٹل میں جگہ بن گئی تو میں وہاں کوچ کرگیا۔۔بعد میں جمی اور مسز جمی سے میرے اچھے مراسم بن گئے تھے ،جب میں ان کے موٹل ۔میں دو ماہ سے زیادہ عرصہ رہا ۔۔ بلکہ مسز جمی نے تو مجھے سن یعنی بیٹاکہنا شروع کردیا تھا۔۔ اور جہاں باقیوں کے لیئے سٹرکٹ قسم کے قوانین تھے۔۔میرے لیئے کافی نرمی تھی ان ۔۔
میں۔۔کیا خاموش مگر خوبصورت دو ماہ تھے وہ بھی۔۔خوبصورت احساس رکھتے لوگوں کے درمیان۔۔
جمی کی زبان کی پاسداری کو دیکھ کر میں یہ سوچے بغیر نہ رہ سکا کہ ، اسلام زبان کی پاسداری کا درس ہی نہیں حکم بھی دیتا ہے، جس پر ہم میں ایک بڑی تعداد عمل بھی کرتی ہے، مگر ایک بڑی تعداد زبان کو گوشت کے اک ٹکڑے کے سوا کچھ نہیں سمجھتی۔ ان کے خیال میں اسے چکنے اور گپ شپ کے چسکے کے لیئے ہمارے منہ میں رکھ دیا گیا ہے۔ جبکہ رسول اللہ ﷺ نے زبان اور نفس کے کنٹرول کرنے والے کو جنت کی نوید سنائی ہے۔۔
