اسپیکر پنجاب اسمبلی چوہدری پرویز الہیٰ نے حکومت کیلئے خطرے کی گھنٹی بجادی ہے، کہا اتحادیوں کا 100 فیصد رجحان اپوزیشن کی طرف ہے،عمران خان کی حکومت اس وقت واقعی مشکل میں ہے۔
ہم نیوز کے پروگرام"ہم مہر بخاری کے ساتھ" میں خصوصی انٹرویو دیتے ہوئے اسپیکر پنجاب اسمبلی چوہدری پرویز الہی نے اہم انکشافات کیےہیں۔
چوہدری پرویز الہیٰ سے میزبان نے سوال کیا کہ آپ یہ کہنا چاہتے ہیں کہ اس وقت تمام حکومتی اتحادی جماعتوں کارجحان اپوزیشن کی جانب ہے؟
چوہدری پرویز الہیٰ نے جواب دیا کہ 100 فیصد ایسا ہی ہے تمام حکومتی اتحادی جماعتیں اس وقت اپوزیشن کی جانب دیکھ رہی ہیں،اور اس رجحان کو واپس حکومت کی جانب لانے کا فرض وزیراعظم عمران خان کاہے کہ وہ ذاتی طور پر اس معاملے کو دیکھیں اور اتحادی جماعتوں کا اعتماد بحال کریں۔
ایک سوال کے جواب میں انہوں نے کہا کہ حکومت کی جانب سے اب وفود یا نمائندے بھیجنے کاوقت گزر چکا ہے، جن کی جماعت کی اسمبلی میں ایک سیٹ ہے وزیراعظم ان کے پاس بھی تو جارہے ہیں نا، وزیراعظم اگر پہلے ایسا کرلیتے تو نوبت یہاں تک نہ پہنچتی۔
چوہدری پرویز الہیٰ نے اپوزیشن کے اتحاد کو پائیدار اور مضبوط بھی قرار دیا اور کہا کہ جب سیاسی جماعتیں ایک شخص کے خلاف متحد ہوتی ہیں تو وہ ماضی کی تمام تلخیاں بھلادیتی ہیں، حکومت میں عقل ودانش کا فقدان ہے، یہ حکمرانی کے طور طریقے نہیں ہوتے، وزیراعظم عمران خان کو بدلہ لینے کا شوق ہے تو سب کو نیب میں ڈال دیں،
اسپیکر پنجاب اسمبلی نے انکشاف کیا کہ اپوزیشن کا یہ دعویٰ کہ ان کے پاس بندے پورے ہیں بالکل درست ہے، اور ابھی مزید سرپرائز آنے باقی ہیں، عمران خان نے بہت دیر کردی ہےاور اب شگاف پڑگیا ہے۔
حکومتی اتحادی جماعت ق لیگ کے مرکزی قائد چوہدری پرویز الہیٰ یا یہ تہلکہ خیز انٹرویو خبررساں ادارے ہم نیوز پر آج رات 10 بج کر 5 منٹ پر نشر کیا جائے گا۔
