قومی اسمبلی کے ڈپٹی اسپیکر قاسم سوری کی جانب سے بھجوایا گیا خفیہ خط چیف جسٹس آف پاکستان کے سیکرٹری نے وصول کرلیا ہے۔
تفصیلات کے مطابق ڈپٹی اسپیکر قومی اسمبلی قاسم خان سوری نے ٹویٹر پر چیف جسٹس آف پاکستان کے سیکرٹری کی جانب سے خفیہ خط وصول کیے جانے سے متعلق لیٹر شیئر کیا اور کہا کہ میری ہدایات پر قومی اسمبلی کی جانب سے بھیجوایاگیا خفیہ سیل شدہ مراسلہ چیف جسٹس سپریم کورٹ آفس کو موصول ہوگیاہے۔
انہوں نے مزید کہا کہ اس خط میں واضح طور پر لکھاہواہے کہ عدم اعتماد کامیاب ہوئی تو معافی وگرنہ پاکستان کو سنگین نتائج کاسامناہوگا، ہمیں معزز عدالت عالیہ سےمیمو گیٹ طرز کمیشن بناکر انکوائری کی امیدہے۔
قومی اسمبلی کی جانب سے چیف جسٹس عمر عطاء بندیال کو بھجوائے گئے خط کے ساتھ منسلک مراسلے میں کہا گیا ہے کہ قائم مقام اسپیکر کی ہدایات کے مطابق وزارت خارجہ کی جانب سے سامنے لائے گئے خفیہ خط کو معزز چیف جسٹس کی جانب بھجوایا دیا گیا ہے۔
قومی اسمبلی کی جانب سے بھجوائے گئے اس خط کو12 اپریل 2022 کو سیکرٹری چیف جسٹس آف پاکستان نے وصول کیا ہے جس کا ثبوت اس لیٹر پر بھی موجود ہے۔