ترکی میں پاکستانی سفارتخانے نے ویزہ پالیسی میں سخت شرائط عائد کرنے سے متعلق خبروں کی تردید کردی ہے۔
تفصیلات کے مطابق ترکی میں پاکستانی سفارتخانے کی جانب سے ٹویٹر پر آفیشل اکاؤنٹ سے ایک بیان جاری کیا گیا جس میں کہا گیا ہے کہ مختلف میڈیا رپورٹس میں غلط معلومات پھیلائے جانے کو دیکھتے ہوئے یہ وضاحت کرنا ضروری ہے کہ ترکی کی جانب سے ویزہ پالیسی میں کوئی تبدیلی نہیں کی گئی ہے۔
پاکستانی سفارتخانے کے مطابق ترک حکومت نے نہ صرف ویزہ پالیسی میں کوئی تبدیلی کی ہے بلکہ ترکی میں رہائش پزیر پاکستانیوں یا امیگریشن کے خواہش مند افراد کیلئے بھی کوئی سخت شرط عائد نہیں کی ہے، پاکستانی سفارتخانہ ایسے تمام معاملات کے حوالے سے ترک انتظامیہ کے ساتھ مسلسل رابطے میں ہے۔
واضح رہے کہ چند روز قبل مختلف خبررساں اداروں اور سوشل میڈیا پلیٹ فارمز پر یہ خبریں نشر کی جارہی تھیں اور دعویٰ کیا گیا تھا کہ ترکی میں پاکستانیوں کے جرائم کی کارروائیوں میں ملوث ہونے کے بعد ترک حکومت نے ویزہ پالیسی سخت کردی ہے اور ساتھ ہی عارضی رہائش کا اجازت نامی جاری کرنا بھی بند کردیا ہے۔
