وفاق میں مسلم لیگ ن کی حکومت ہے جو کہ موجودہ سیلابی صورتحال کے بعد عوام کی امداد کے نام پر تو کچھ نہیں کر پا رہی البتہ مسلم لیگ ن کا سوشل میڈیا سیل عوام کے زخموں پر مرہم کی بجائے نمک چھڑک رہا ہے۔
مسلم لیگ ن انٹرنیشنل کے سوشل میڈیا ہیڈ سید مظہر علی شاہ نے ایک ویڈیو شیئر کی ہے اور اسے پنجاب سے منسوب کرتے ہوئے دعویٰ کیا ہے کہ پنجاب حکومت اور پرویز الہیٰ صوبے کیلئے کچھ نہیں کر رہے اور نتیجے کے طور پر ہزاروں من گندم سیلابی پانی کے باعث ضائع ہو گئی ہے۔
تاہم یہ دعویٰ درست نہیں کیونکہ ان کی جانب سے شیئر کی گئی ویڈیو سندھ کے کسی علاقے کی ہے۔
یہ ویڈیو کلپ رکن سندھ اسمبلی نصرت سحر عباسی نے شیئر کی اور اسے سندھ حکومت کی نااہلی بتایا ہے۔ انہوں نے مزید لکھا کہ سندھ حکومت ستو پی کر سو رہی ہے افسوس صد افسوس۔
اسی ویڈیو کو خواجہ آصف نے ری ٹویٹ کیا تو احمد وڑائچ نے کہا کہ ملک سیلاب میں ڈوبا ہے، حکومت بجائے اس کے کہ عوام کو ریلیف دے، جھوٹی ویڈیوز شئیر کرنے میں مصروف ہے۔ خواجہ صاحب یہ سندھ ہے۔
ڈاکٹر رفیق چانڈیو نے کہا کہ یہی ویڈیو سندھ اسمبلی میں اپوزیشن رکن نصرت سحر عباسی نے شیئر کی ہے اندازہ کریں کہ یہ ہمارے ارکان اسمبلی ہیں۔
زبیر اسلم نے کہا کہ یہ وقت سیاست کا نہیں ہے۔ یہ وقت انسانیت کی خدمت کا ہے۔ کسی کو ذمہ دار نہ ٹھرائیے۔ یکجہتی کا ثبوت دیں اور یہ کلپ سندھ کا ہے پنجاب کا نہیں۔