میرے خیال میں خیبرپختونخوا کے نگران وزیراعلیٰ اعظم خان بھی واک آئوٹ کر جائیں گے! : ماہر قانون ورہنما پی پی پی
نجی ٹی وی چینل آج نیوز کے پروگرام فیصلہ آپ کا میں گفتگو کرتے ہوئے ماہر قانون ورہنما پاکستان پیپلزپارٹی اعتزاز احسن کا کہنا تھا کہ سپریم کورٹ آف پاکستان کے فیصلے کے خلاف جانے سے گریز کرنا چاہیے،
اگر سپریم کورٹ کے فیصلے پر عملدرآمد کر لیا تو کوئی بحران پیدا نہیں ہو گا۔ نگران حکومت 90 دن سے زیادہ تک کس مینڈیٹ کے تحت رہے گی؟ 90 دنوں بعد پنجاب اور خیبرپختونخوا کی نگران حکومت ساری ایڈمنسٹریشن سمیت ختم ہو جائے گی۔
اعتزاز احسن کا کہنا تھا کہ پنجاب اور خیبرپختونخوا میں نگران حکومت ختم ہونے کے بعد خلا پیدا ہونے پر کیا ہو گا؟ کیونکہ نگران حکومت مقررہ مدت تک رہ سکتی ہے، خلا پیدا ہوا تو حکومت میں کوئی اور ہی آئے گا۔ انہوں نے آئین پاکستان کا حوالہ دیتے ہوئے کہا کہ نگران حکومت 90 دن کے بعد قائم نہیں رہ سکتی اور آئین کے مطابق 21 دنوں بعد نئی حکومت نے اقتدار سنبھالنا ہوتا ہے۔
انہوں نے کہا کہ 90 دن گزرنے کے بعد نگران وزیراعلیٰ محسن نقوی کس مینڈیٹ کے تحت اقتدار پر رہ سکیں گے اور میرے خیال میں خیبرپختونخوا کے نگران وزیراعلیٰ اعظم خان بھی واک آئوٹ کر جائیں گے! کیونکہ اگر انتخابات نہ کروائے جائے تو ان کے پاس بھی اقتدار میں رہنے کا مینڈیٹ ختم ہو جائے گا، اس لیے نئی حکومت نہ آنے پر وہ اپنا عہدہ چھوڑ دیں گے۔
انہوں نے کہا کہ انتخابات کے معاملے پر 5 ججز نے بحث سننے کے بعد فیصلہ دیا ہے، یہ معاملہ اب دوبارہ عدالت میں نہیں جائے گا۔ انتخابات سے کسی صورت گریز نہیں کیا جا سکتا کیونکہ 90 دنوں کے بعد ایک سیکنڈ بھی نگران حکومت اقتدار میں نہیں رہ سکتی۔ سپریم کورٹ کے فیصلے کو ماننا پڑے گا، ایسا نہ کیا گیا تو یہ توہین عدالت کے زمرے میں آئے گا۔
