مسلم لیگ ن کی نائب صدر مریم نواز شریف نے کہا ہے کہ حکومت کی جانب سے منظور کیے گئے قوانین عمران اینڈ کمپنی کے خلاف ہی استعمال ہوں گے۔
انہوں نے یہ بات مائیکرو بلاگنگ ویب سائٹ ٹویٹر پر اپنے بیان میں کی اور کہا کہ یہ حکومت جو بھی قوانین بنارہی ہے وہ کہنے کو تو میڈیا اوراپوزیشن کی زبان بند کرنے کیلئے ہے مگر یہ قانون سازی عمران خان اور ان کی کمپنی کے خلاف استعمال ہوگی، پھر نا کہنا کہ بتایا نہیں تھا۔
واضح رہے کہ وفاقی حکومت نے بذریعہ آرڈیننس کے ذریعے پیکا اور الیکشن کمیشن کے ضابطہ اخلاق سے متعلق تبدیلی کے قوانین پاس کردیے ہیں۔
اس حوالے سے پریس کانفرنس سے خطاب کرتے ہوئے وفاقی وزیر قانون فروغ نسیم نے کہا کہ الیکشن ضابطہ اخلاق میں تبدیلی سے متعلق قانون بابر اعوان نے تیار کیا جبکہ پیکا کے قانون کی ڈرافٹنگ میں نے خود کی ہے۔
انہوں نے مزید کہا کہ پہلی بار کوئی حکومت جرنلسٹ پروٹیکشن بل لائی ہے، پیکا قانون سب کیلئے ہوگا، میڈیا کو تنقید کرنے میں آزادی ہوگی مگر جھوٹی خبریں پھیلانے کی اجازت نہیں ہوگی، یہ آرڈیننس میڈیا پر قدغن نہیں ہے۔
فروغ نسیم نے بتایا کہ جعلی خبر چلانے والوں کو 3 سے 5 سال تک کی سزا ہوسکتی ہے، عدالتوں کو یہ کیسز 6 ماہ میں نمٹانے کا وقت دیا جائے گا۔
