چین نے پاکستان سے کتے اور گدھے درآمد کرنے کی خواہش ظاہر کردی، سینیٹ کی قائمہ کمیٹی برائے تجارت میں حکام نے کمیٹی اراکین کو بتایا کہ چین پاکستان سے گدھے اور کتے درآمد کرنے کا چاہتا ہے۔
سینیٹر ذیشان خانزادہ کے زیر صدارت سینیٹ کی قائمہ کمیٹی برائے کامرس کا اجلاس ہوا،جس میں قائمہ کمیٹی کے حکام نے نے بتایا کہ چین اب پاکستان سے گدھے درآمد کرنا چاہتا ہے، رکن کمیٹی دنیش کمار نے کہا چین کہتا ہے پاکستان گدھے اور کتے برآمد کرے،چین گوشت برآمد کرنے کی ایک بڑی مارکیٹ ہے۔
کمیٹی رکن مرزا محمد آفریدی نے کہا کہ افغانستان میں جانور سستے ہیں، خریدار نہیں ہے، افغانستان سے جانور امپورٹ کرکے گوشت برآمد کیا جا سکتا،اس تجویز پر حکام نے بتایا کہ لمپی اسکن کی وجہ سے افغانستان سے وقتی طور پر جانور درآمد کرنے کی اجازت نہیں ہے۔
مرزا آفریدی نے کہا کہ ہم بیشک ایک روٹی کھائیں لیکن برآمدات نہیں رکنی چاہیں، برآمدی شعبے کو زیادہ سہولیات دی جائیں کیونکہ اس سے زرمبادلہ آتا ہے، ٹیکسٹائل کے سولہ سو یونٹس بند ہوگئے ہیں،سینیٹر عبدالقادر نے کہا چینی سفیر کئی بار گوشت برآمد کرنے کا کہہ چکے ہیں۔
اجلاس میں دیگر اہم امور پر بھی گفتگو کی گئی، ارکان نے کہا کہ بلوچستان میں ماہی گیر گہرے سمندر سے مچھلیاں پکڑ کر غیر ملکی ٹرالرز کو وہاں ہی فروخت کر دیتے ہیں، اس اقدام سے قومی خزانے کو اربوں ڈالر کا نقصان ہو رہا ہے۔
خصوصی سیکریٹری تجارت نے اجلاس کے دوران بتایا کہ کپاس کا بڑا مسئلہ ہے، جس کے باعث ٹیکسٹائل اور ایکسپورٹ انڈسٹری کو مشکلات درپیش ہیں، فنڈز کی کمی کے باعث برآمدی شعبے کی بجلی کی سبسڈی ختم کی گئی، فنڈز کی دستیابی پر یہ سبسڈی دوبارہ دی جائے گی،وزارت تجارت کے حکام نے بتایا کہ جنوری سے اپریل تک ای کامرس کے ذریعے ایک کروڑ بیس لاکھ ڈالر حاصل ہوئے۔
