لاہور کے پریس کلب کے باہر نامعلوم افراد کی فائرنگ سے حسنین شاہ نامی صحافی جاں بحق ہوگئے ہیں، وزیراعلی پنجاب عثمان بزدار نے نوٹس لے لیا۔
خبررساں ادارے کی رپورٹ کے مطابق لاہور کے علاقے شملہ پہاڑی پر واقع پریس کلب کے باہر موٹر سائیکل پر سوار دو لوگوں نے صحافی حسنین شاہ پر فائرنگ کردی جس کے نتیجے میں ان کی موت واقع ہوگئی ہے۔
ابتدائی معلومات کے مطابق حسنین شاہ پریس کلب کے باہر اپنی گاڑی میں موجود تھے کہ موٹر سائیکل سواروں نے ان پر فائرنگ کردی اور فرار ہوگئے۔
عینی شاہدین کے مطابق کار میں سوار شخص فائرنگ کے فورا بعد موقع پر ہی دم توڑ گئے تھے، حملہ آور جس موٹر سائیکل پر سوار تھے اس پر "ایل ای آر330" کی نمبر پلیٹ آویزاں تھی۔
وزیراعلی پنجاب عثمان بزدار نے صحافی کے قتل کا نوٹس لیتے ہوئے آئی جی پنجاب سے رپورٹ طلب کرلی ہے، وزیراعلی نے قتل میں ملوث ملزمان کی فوری گرفتاری اور ملزمان کے خلاف سخت کارروائی کی ہدایات جاری کردی ہیں۔
وزیراعلی نے صحافی کی موت پر دلی ہمدردی اور تعزیت کا اظہار کرتے ہوئے کہا کہ مقتول حسنین شاہ کے لواحقین کو ہر صورت انصاف فراہم کیا جائے گا۔
دوسری جانب سی سی پی او لاہور نے بھی واقعہ پر افسوس کا اظہار کرتے ہوئے اس کی مذمت کی اورتمام سینئر پولیس افسران کو موقع واردات پر پہنچنے کی ہدایات جاری کردی ہیں، انہوں نے کہا کہ ملزمان کی گرفتاری کیلئے تمام وسائل بروئے کار لائے جائیں گے۔