لاہور پولیس نے ٹریفک قوانین کی خلاف ورزی کرنے والوں پر جرمانوں میں بڑا اضافہ کر دیا۔ سٹی ٹریفک پولیس لاہور کی جانب سے سوشل میڈیا پر جاری پوسٹ میں شہریوں کو خبردار کرتے ہوئے کہا گیا ہے کہ اب ٹریفک قوانین کی خلاف ورزی پر 200، 300 اور 500 کے بجائے 2 ہزار اور 5 ہزار جرمانہ ہو گا۔
اس حوالے سے سی ٹی او لاہور منتظر مہدی نے ڈی آئی جی ٹریفک پنجاب کو سفارشات بجھوا دی ہیں۔ ٹریفک پولیس لاہور کی جانب سے سوشل میڈیا پر جاری پوسٹ میں جرمانوں کی تفصیلات بھی بتائی گئی ہیں۔
تفصیلات کے مطابق موٹر سائیکل کی غلط پارکنگ پر 2ہزار روپے جبکہ کار کی غلط پارکنگ پر 5ہزار روپے کا جرمانہ ہو گا۔ بغیر لائسنس موٹر سائیکل چلانے پر 2ہزار روپے جبکہ موٹر کار چلانے پر 5ہزار روپے کا جرمانہ ہو گا۔
ون وے کی خلاف ورزی کرنے والے موٹر سائیکل سواروں پر 2ہزار روپے اور موٹر کار والوں پر 5ہزار روپے جرمانہ عائد ہو گا۔ کالے شیشے والی گاڑیوں کو 5ہزار روپے جرمانہ دینا ہو گا۔
بغیر نمبر پلیٹ یا فینسی نمبر پلیٹ والی موٹر سائیکلوں پر 2ہزار روپے جبکہ موٹر کاروں پر 5ہزار روپے کا جرمانہ ہو گا۔ دیگر خلاف ورزیوں پر موٹر سائیکل پر 2ہزار روپے جبکہ موٹر کار پر 5ہزار روپے کا جرمانہ ہو گا۔